KIO Ningbaw malai kaw nna KIO Ginjaw a, ya yang na mung masa sat lawat hte policy ni hpe sang lang dan

KNO-India malawm ni hte KIO Ningbaw malai Gauri Zau Seng gaw KIO a mung masa lam yan hte seng nna sang lang, san htai galaw ai lamang hpe June shata 7 ya shani jahpawt hkying 9:30 a.m. kaw nna shana de 4:00 p.m. du hkra ROKA-I rung hta galaw lai wa sai.

Shawng nnan KIO Ningbaw malai, Dukaba Gauri Zau Seng kaw nna ya na zawn hkrum shaga na matu du sa wa ai hpe kabu gara hkap tau hka lum la ai lam hte ga hpaw tsun sai. Dai hpang matut manoi tsun shaga mat wa ai hta lawu na hte maren lamang kru hpe galaw mat wa sai.

KIO Ningbaw malai sanglang dan ai daw

1. Wunpawng mung bawng rap daw (WMR) hte seng ai lam
2. KIO Gin jaw aq masing hte galaw sa wa ai magam bungli lam
3. NC hte SPDC aq lam
4. KNO aq lam
5. Delhi du wunpawng tsinyam hte seng ai lam
6. Gasan ga htai lam ni hpe galu galang tsun sang lang dan mat wa ai. Dai zawn tsun sang lang mat wa ai hta:

1. WMR hpe 2002 ning October hta hpaw ning htan ai re lam yaw shatawng shada ai lam gaw, dai ni na wunpawng myu sha ni aq shawng lam masa hpe KIO hku nna sha nmai ai, buga shagu na mung shawa machye machyang hpaji chye ai kanu kawa myit su salang, KIO, KDA, NDA-K kawn du salang ni hte myu sha lam yan hpe galaw sa mat wa na matu hpaw ning htan da ai re lam tsun ai.

2. KIO gin jaw kawn ya ten buga gaw sharawt masing hpe galaw nga ai hta mawdaw lam, tsi gawk, laika sharin jawng hte wanjak kaba zawn re ni hpe sha chyaw nga ai lam tsun. Ndai zawn buga gaw sharawt magam bungli galaw ai hta jai lang ai ja gum hpraw ni gaw SPDC ni, hpaga la ni, Miwa mung de htaw shalai dut ai hpun kawn tax hta la ai gum hpraw ni re lam, dai ni hpun hpaga hpe madung galaw taw ai gaw SPDC re ai lam, Sagaing Division kawn maisak ton (500) shapraw yang ton (200) sha tara shang panglai hkalam (seaway) hku pru nna, ngam ai ton (300) gaw KIO ginra Laiza mare hku Miwa mung de dut sharu ai re lam tsun ai.

3. NC hte seng nna 2006 shaning htum (sh) 2007 hta ngut kre lu na re lam, 2007 hta NC kawn kada ngut sai mung dan gaw da tara (constitution) hpe mung shawa hpang de jahkrat madun n htum (referendum) ga law na re lam, dai hpang 2008 hta gaw ra ta ra poi (election) hpe galaw lu na re ngu maram lu ai lam hpe tsun ai. KIO hku nna NC de sa lung ai lam hta Mung bawng rap daw kaw bawng ban jahkrup la nna shang lawm ai re lam tsun. Bai nna KIO hku nna laiwa sai April shata hta hpaw ning htang da ai Mung masa bung hkan komati (Political Working Committee) kaw nna (1) Dr. Tu Ja (2) Dujum Lahpai La (3) Sarakaba Kumhtat Hting Nan ni madung woi awn nna buga shara shagu de shamu shamawt nga ai lam tsun ai. Ndai zawn shamu shamawt ai lam gaw referendum ngut nna ra lata poi galaw wa ai shaloi tinang tinang Kachin ni mung jin jin rai taw ra ai hta sha n-ga Kachin state nga laga myu sha hpu nau ni hpe mung tau hkyen zin lum ai lam re hpe tsun ai.

Constitution hte seng nna ahkyak ai malawng maga 80% ngut sai rai nna kaji kajaw ra ai gaw 20% sha rai sai lam tsun. Ndai constitution hta 25% non-elected gaw Ginjaw (Central) kaw Myen hpyendap ni hku nna shara la tawn da chyalu rai sai re majaw, mungdaw (state) kaw gaw non-elected 25% hpe hpyen ni hku nna shara la nra sai, state kaw nna mung shawa ra ai hku 100% lata la na hpe ethnic groups ni hku nna du hkra tang shawn tsun dang rang nga ai lam, mung daw hkring mang daju hpe mung daw kawn, ra lata hte wang lu wang lang lata san na lam, raitim SPDC ni tsun ai gaw mung daw lata san da ai mung daw hkring mang daju hpe ginjaw asuya kawn myit hkrum ai masha rai ra ai lam, ginjaw kawn myit n-hkrum yawng lahkawng lang ngu na ra lata bai galaw ra ai lam, lahkawng lang ra lata tim ginjaw myit nhkrum yang masum lang ngu na hta ginjaw kawn ading tawt mungdaw hkring mang daju hpe lata san na re lam tsun sai.

Mungdaw mying ni hpe mung Kachin State, Shan State n-ngu ai sha SPDC gaw (myu noi su pyi ne) ngu nna sha mying mayu ai lam, mungdaw lamu ga jarit (border areas) ni hpe mung 1947 ning na constitution hku rai na kun (snr) 1974 ning na constitution hpe la na kun (snr) SPDC aq hkrang nnan rai na kun ngu ai gaw tsun nlu shi ai lam, dai ni anhte awng sharawng ai federal mung hpawm mungdan gaw SPDC aq lak htak hta gara hku mung nmai byin ai, shan hte ni dai ga si hpe galoi n-tsun ma ai. SPDC sha a-nga nga ding sa federal mung hpawm mungdan nmai byin ai lam tsun ai.

4. KNO hpaw ai nga jang mung Kachin aq matu galaw ga. KIO gaw Kachin aq matu nga jang n-gun jaw ai. Yaw shada lam hpe shada chye na hkat yang gaw grau kaja na re. (1) Duwa Howa Ja La (2) Dr. Stephen Mose (Dr Lahtaw Naw Lawn) (3) Slg. Bawmwang La Raw ni hpe Ginjaw KIO kawn maigan kyit hkai ahkaw ahkang laika jaw ai hpe tsun.

5. 2002 ning hta kanu mung dan kawn wunpawng myu shani unawng uwa India de du pru wa ai lam hpe ngai Thai kaw nga ai ten hta na lu ai lam tsun. Hpa mi rai rai kalang mi pru wa sai re majaw akyu rawng hkra shakut ga, India kaw hpa ji hkum hkra mai sharin la ai lam, shakut myit rawng ra ai lam, India gaw mung kan madang shing jawng taw ai mung dan kaba langai re ai lam KIO hku nna laiwa sai aten hta Wunpawng tsin yam ni hpe myit du tim hkum nlu du, myu sha magam hta ra wa ai lam ni hpe n-gup a-ga hku nna rai tim phone, email raitim tinang, KIO rung kawn raitim KIO gin jaw de ading tawt hpa ji jaw tsun shaga la mai ai lam ni tsun nna India du Wunpawng tsin yam ni aq matu KIO hku nna Rs. 40000 hpe Wunpawng tsin yam komati la ta de ap ya sai.

KIO Ningbaw malai hte KNO-India malawm ni a gasan-ga htai

Z.Di La: NC ngut ai hpang constitution hte seng nna mung shawa hpe referendum galaw wa ai shaloi, lama na mung shawa hku nna ndai constitution hpe n ra sharawng ai lam mahtai jaw wa yang KIO hku nna kaning re masing hte bai matut galaw na?

KIO Ningbaw malai: KIO hku nna gaw mung shawa ra sharawng ai lam hpe WMR kaw jawm bawng ban ja hkrup nna mung shawa daw dan ai hku sha rai na re.

Z.Di La: Ya yang na masa hpe maram yu yang WMR gaw mung masa a dan a leng tsun shaga ai lam nnga ai. Dai majaw WMR hpe madaw full power ap ya nna mung masa hpe gwi gwi tsun shaga wa yang WMR aq matu tsang ra ai lam nga na kun?

KIO Ningbaw malai: WMR hpe ya du hkra SPDC kawn ding bai ding na jaw ai lam nnga ai. WMR gaw myu sha lam yan hpe uhpung she re. Mung masa party hpung n-re. Mung masa hpe ading tawk n-ga law ai.

Z.Di La: Dai ni anhte Jinghpaw Wunpawng Myu Sha kata kaw mung SPDC hpe ning hkap(attack) galaw na matu tinang kata hting grum myit hkrum lam galaw nna secret mission langai hpaw yang gara hku? Lama wa.... ndai zawn rai SPDC hpe ninghkap na matu shang wa yang KIO hku nna gara hku?

KIO Ningbaw malai: Kata de kun shing gan de kun ?

Z. Di La: Kata shing gan yawng kaw ngu mayu ai.

KIO Ningbaw malai: Kata de gaw n mai ai.

Z.Di La: SPDC gaw shanhte aq hpyenla ni lagut da-mya mi rai yang rai, lama ma shut nna anhte ni rim da yang shanhte masha hpe lu hkra bai hpyi la ma ai. Dai ni anhte hpyen la ni hpa mi shut yang shut u ga.. anhte hpyenla ni hpe anhte sharin la na, je yang ra yang anhte je yang na. SPDC je yang nra ai. Dai ni KIO ngu ai mung mungdan a lam hpe pi tsun jahta taw nga ai mung masa rawt malan hpung kaba re. Bai ya ten ceasefire la nga ai ten sha re… hpa majaw anhte masha hpe anhte nmai woi la ai ta?

KIO Ningbaw malai: KIO Ginjaw policy langai nga ai… dai gaw shawng lam hta byin ai manghkang hpe shawng lam hta hpa ran na. Shawng lam hta byin ai mang hkang aq majaw Ginjaw masing hpe nhkra u ga ngu Yangon asuya hte tsun shaga da ai lam nga ai. Shanhte gaw nteng nman ai sakse ni hte n tsa de tang shawn da ma ai. Anhte kaning ngu tsun tim shanhte mung tsun na mi a-nga nga malu ai.

Dai majaw nanhte shinggan de nga ai ni mung gara hku di yang mai na ngu na ladat naw jawm shaw lawm marit.

Lahpai Zau Lawt: KIO hku na mung masa policy ni hpe mung shawa yawng chye na hkra lawan ai ladat hte, mung shawa kaw du lu hkra radio nsen shapoi dap hpe lu galaw yang gaw grau kaja na re ngu mu mada ai..

KIO ning baw malai: Ndai program hte seng nna anhte shakut yu nga ga ai

1.wan [electric] ra ai
2.Ja gumhpraw law law ra ai.
3.Technology machye machyang ra ai

Lahpai Zau Lawt: Wunpawng ramma ni, kani ya tai mat masai. Du na ten shaning 10, 20 ning laman hta Wunpawng ramma ni nnga mat wa na masa rai wa sai. KIO hku nna ndai lam hpe aja awa lit la let ramma ni hpe shakung shalat wa yang she mai na sai ngu mu mada ai.

KIO Ningbaw malai: Ndai lam hpe KIO hku nna sahkut galaw tim tang du hkra galaw lu ai lam nnga ai.

Lahpai Zau Lawt: Ceasefire galaw ai hpang Wunpawng ginra de SPDC ni shara la ai, ginra law law hpe madu kau sai. KIO hku nna tax hta, war fund hta hpyenla lahkawn nmai ai. Anhte masha hpe kam mara di tim KIO hku nna baw gum hkam sharang ra ai lam gaw hpa majaw kun? SPDC ni hte ganing re agreement la shut da ai lam nga ai majaw kun?

KIO Ningbaw malai: Prat galai shai wa sai ten re. Mungkan hta lai wa sai ten cold war, dai kaw nna mungkan gaw hpyen gasat ai hpe nra wa sai re. Dai hpang globalisation masa de bai galai wa sai re. Sut masa lam hpe n’gun shaja wa masai, anhte ni mung moi na hku sha, moi na hpe sha, ngu manat jung nga nmai sai. Dai ceasefire la ngut ai hpang Jinghpaw buga shagu hta 10 ning jan laran ma ni lam ntsa hkan grai gagat hkawm ai hpe mu ai shaloi grai kabu ai.

Lum Nan: NC zuphpawng 2007 hta constitution ngut ai hpang, mung shawa hpang de hpyan madun dat nna, ra lata galaw wa ai ten Kachin myu sha ni a matu akyu nga ai constitution nbyin wa ai shaloi anhte KIO hku nna simsa lam la da ai hpung [or] hting bu mung dan ni hte kata lam bawm ban da ai lam ni nga ai kun?

KIO Ningbaw malai: Ya yang na masa nga yang anhte kata hta mung shada jahkrup myit hkrum na matu yak ai. Wa hte Kukang ni mung Miwa ga shaga nna Miwa ni hte re ai zawn Mun, Sam, Kayin ni gaw Thai ni hte ni nga ai re majaw shanhte hte jahkrup na matu yak ai. Dai majaw Kachin ni a lam hpe Kachin mung shawa hte rau hkawm sa na matu she shajin ra ai.

Mahkaw Htoi Naw: WMR hpe mung masa uhpung shatai la nna anhte yawng a daju shatai yang kaja na kun ngu mu mada ai. Dai uhpaung hta myu lakung 6 na (delegates) datkasa lata shalun yang grau ngang na hpe mu mada ai.

KIO ningbaw malai: WMR hpe power jaw da ai. Myitkyina kaw WMR ni woi awn nna hka bra nga ai hpu nau ni hte bai hkrum na matu woi awn galaw ta masat htu ngut sai, raitim kaja wa hkrum ga nga yang ta masat htu da ai ni ndu ma ai. KIO gaw daini du hkra dai myithkrum tamasat laika hpe naw jum tek nga ga ai.

Nsang Mung Hpan: Hpyen asuya ni ya bai shagrin ai constitution hta KIO hku nna moi na hpe la na kun? Ya na SPDC masat ai hpe hkap la na kun?

KIO Ningbaw malai: SPDC gaw mungdaw lamu ga ngu ai hpe shamat kau mayu nga ai re Anhte ni hku nna moi shanglawt nnan lu ai ten na mungdaw masat hpe NC hta hpyi shawn da chyalu re. Gara mahtang hpe shagrin ya na ngu gaw nlu tsun shi ai.

Htin Mann Shin: KIO hku nna NC hta tang shawn da sai, ngu ai hku nna sha nmai na re, tang shawn da ai lu hkra ga law ra na re.

KIO Ningbaw malai: Kara hku galaw na ngu hpe mung tsun yu rit.

Htin Mann Shin: Anhte hkrai gaw nmai ai, laga rawt malan hpu nau ni rai nga ai Kayin, Kaya, Sam, Mon, Chin, Arakan zawn re ni hte myithkrum gahkyin nna galaw sa wa yang hkrak awngdang na re.

KIO Ningbaw malai: KIO hku nna NDF, DAB zawn re hte mung bungli rau jawm galaw yu sai. 1988 hpang hta pru wa ai ABSDF hte Pi Chyit Party zawn re hpe laknak gumhpraw zawn re mung garum lai wa yu sai. U Nu a kasha U Awng ni KIO hpe Thai Bath sen [25] masu sha mat wa ai zawn re mung nga wa yu sai.